حل سحرى لكل عروسة فرحها قرب مجموعه من الوصفات الطبعية للعناية بالشعر البشرة الجسم
لازم البنت قبل فرحها ب 3 شهور عالاقل تعمل لنفسها برنامج تمشي عليه لكل مناطق جسمها وطبعا في بنات مبيبقاش عندهم مساحه ودول بقولهم ابدأو بردو اكيد هيكون ف نتيجة بتحسن ... بس في ماسكات ووصفات بيبان نتيجتها من اول او تاني مره وهكتبلكو بردو عنها
 |
| حل سحرى لكل عروسة فرحها قرب مجموعة من الوصفات الطبعية للعناية بالشعر البشرة الجسم |
كلنا عرفين ان الوقت الي قبل الفرح بيبقي في مشاوير كتير ومفيش وقت لماسكات وعشان كدا علي قد مقدر اختصرتلكو الخطوات اوي وعملناها مكثفه عشان تكون خفيفه عليكي
وصفه للعناية بجميع اجزء الجسم لكل عروسة فرحها قرب
خلينا متفقين فحصر المشاكل الي عندنا كلنا كبنات
تساقط الشعر - خشونة الشعر والتجاعيد والهيشان - بهتان البشره وعدم نضارتها - الحبوب واثار الحبوب البقع الداكنه - الهالات السودا - الخطوط الرفيعه بالوجه - المناطق الغامقه بالجسم - حبوب ومشاكل الضهر - غمقان واسمرار المناطق الحساسه - حبوب وغمقان المؤخره - الايدين والرجلين وجفافهم
اول حاجه فالبرنامج هقولكو عليها لكل عروسه
- قبل الفرح بفتره هنكثف اوي شرب المايه
- هنبدأ نظبط مواعيد نومنا ونلغي السهر وتنامي 8 ساعات
- هنقلل القهوه والبيبسي والشاي والنسكافيه وهنبدله بكوب شاي اخضر واحد يوميا
- هنكتر من اكل الفاكهه و شرب العصاير الفريش
- السلطه اساسيه كل يوم ونحاول نكتر فيها الجرجير
- هنقلل الدهون اووووي فالاكل بقدر الامكان
- هنستشير دكتور فنوع فيتامين مناسب قرص يوميا
- الاكل كل اسبوع ليكي وجبتين سمك او تونه وسبانخ
الحاجات الي قولتهالكو دي بيبان اثرها علي الجسم والشعر والبشره لما تمشو عليهم وكمان بيبان من اول شهر بجد
ويالا هنبتدي بخطوات سريعه ومفيده بالعنايه بكل منطقه
الشعر ومشاكله
_ هتحددي مشكلة شعرك ايه وهتبتعدي عن الاخطاء وهتمشي عالنظام الي كتبتهولك فوق تتعاملي صح مع الشعر
- تسليك الشعر قبل الدخول للشاور مش وهو مبلول
- تستخدمي حاجه قطن لتنشيف الشعر بدل الفوطه
- توقفي استخدام المشط البلاستيك وتبدليه بخشب
- استخدمي دهان جوجوبا هايل جدا بعد الشاور لعلاج الهيشان والتساقط
- لو بتعملي شعرك علي طول هنستخدم سيرم واقي من الحراره زي One
- لو هتصبغي شعرك قبل الفرح كثفي حمام الكريم او الزيت مرتين فالاسبوع
- لو هتعملي شعرك بروتين قبل الفرح ابتدي بدري فالفيتامين عشان تتجنبي حدوث التساقط الناتج عن البروتين
- هتشتري سيشوار وبيبي ليس ماركه كويسه وانا بفضل ماركة بيبي ليس ودول هيفيدوكي اوي بعد الجواز
- هتبداي بقي تتعلمي ازاي تعملي طقيه 😃 هنحتاجها
- لو محجبه هتهوي شعرك كل يوم 10دقايق وتقلبي راسك لتحت وتعملي مساج لفروة راسك دا مفيد جدا
- فالشتا هنمنع غسل الشعر بمايه سخنه دا هيسببلك قشره
- لوعندك مقدرة ماليه تجيبي جهاز بخار يبقي كويس جدا هو سعره كان 450وقت مجبته من سنه دلوقتي مش عرفه وصل لكام
وصفات الشعر والماسكات
* هتستخدمي زبدة الشيا هايله للشعر هنجبها من مكان موثوق فيه وهنضيف ليها زيت ارجان وزيت جنين قمح نعملها مره فالاسبوع لمدة ساعتين ولو استخدمتي بخار كويس لنتيجه احسن
* زيت جوز الهند البكر الخام سحررررر للشعر ممكن تستخدميه كحمام دافي تدلكي بيه فروة الراس نصف ساعه مع استخدام فوطه سخنه او تعملي خلطة زيوتّ
زيت جوز الهند + زيت الجوجوبا + زيت اللوز الحلو + زيت جنين القمح + زيت سمسم + زيت زيتون + زيت خروع
ومره كل اسبوع لمدة ساعتين مع التنشيف بحاجه قطن ودهن زيت جوجوبا كدهان بعد التنشيف
* وصفة لبن جوز الهند + زيت جوز الهند+زيت جنين القمح + زيت لوز حلو هايله بردو جدا جدا جدا ومرممه للشعر واضرار الصبغه والشعر المتهالك
* تغذية الشعر موزه مهروسه + نصف ثمرة افوكادو مهروسه + زيت جنين القمح + زيت جوجوبا + زيت جوزهند
مره اسبوعيا لمدة ساعه او ساعه ونصف
* الشعر الدهني الصبار والجرجير هيكون وصفه كويسه ليه
زيت جرجير+ مادة الصبار + زيت زيتون مره اسبوعيا
هتختاري من الوصفات دي وصفتين يناسبوكي تعمليهم مرتين كل اسبوع ولو في اي استفسار بخصوص الوصفات انا معاكو
البشره
- هنمنع غسل الوش بمايه سخنه
- هنشف بحاجه قطن
- نوقف شويه الغسول ونبدله بصابونه طبيعيه مرطبه لعلاج البشره
- هنتأكد كل يوم قبل النوم من نضافة مسام البشره وخلوها من اي مكياج ونضفها بقطنه وزيت جوزهند او زيت زيتون
- هنوقف الفاوندشن الخافي للعيوب الي نسبة تغطيته عاليه وندي البشره فرصه تتنفس عشان نعالجها
- لو مضطره للفاوندشن هاتي حاجه خفيفه Bb او فاوندشن طبي زي pharmaceris هايل جدا
- هنمشي عالنظام الي كتبتهولكو فوق بخصوص التغذيه والمايه
- هنعمل سكرب للشفايف مرتين او تلاته فالاسبوع للتخلص من الجلد الميت وعلاج غمقان الشفايف وتنعيمهاوترطيبها
- دهان زيت الجوجوبا بشكل يومي قبل النوم معالج للبشره
- البشره الدهنيه وحبوبها هنستخدملها طماطم مهروسه كل يوم ويوم او عصير طماطم ساقع مضاف اليه زيت زيتون نقطتين وبقطنه ندلك بيه البشره او الطماطم لوحدها
- *زيت جنين القمح هايل للبشره وعلاجها من التجاعيد والخطوط الرفيعه
ماسكات ووصفات البشره
الهالات السودا نتاكد انها مش وراثه ونمشي عالخطوات الي كتبتهالكو فوق بتاعة التفذيه وهنمنع السهر تماما ونوم كافي 8 ساعات و ماية كتير والتغذيه وشرايح بطاطس مرتين فالاسبوع علي المنطقه نصف ساعه وشرايح خيار منقوعة فزبادي فالتلاجه لمدة نصف ساعه ووضعها عالعين نصف ساعه وخلط زيت جنين قمح + زيت لوز حلو + زيت جوزهند + 3 كبسولات فيتامين ه ووضعهم فازازه ترج قبل الاستخدام كل يوم قبل النوم
لو العينين فيها خطوط رفيعه او تجاعيد من غير هالات هندهن زيت جنين القمح لوحدو
لتفتيح البشره وتوحيد لونها وتنعيمها هنستخدم ماسك الحنا البيضا مرتين كل اسبوع وهنضيف عليه ماية ورد ولبن وعسل وزيت لوز حلو وتسيبه لمدة نصف ساعه ونفرك كسكرب ونشطف بمايه بارده
السكرب التقشير بتاعنا 3 مرات فالاسبوع كل مره هتعملي نوع من دول او اختاري نوع اعمليه ال 3 مرات هو هو
سكر + خميرة فوريه + نقطتين ليمون + نقطة زيت ورد +زيت زيتون + عسل
قهوة + سكر + زيت لوز
هندلك البشرة بلبن بودره وماية ورد
هنعمل لوشن مفتح للبشره ومعالج ليها بس هنغسله بعد شويه مكون من لبن + عصير خيار + عصير طماطم + عصير ليمون مره كل يوم
ماسك الترمس المنظف اساسي معانا
لشد البشره سريعا وعلاج الخطوط الرفيعه والتجاعيد تخف هنعمل ماسك موز مهروس+ لبن + عسل + فيتامين ه + زيت جنين القمح ....مره كل 10 ايام لمدة نصف ساعه
اخييرا الكريم الليلي المعالج بتاعنا
كريم نيفين سوفت الابيض الصغير + 8 كبسولات فيتامين ه + زيت جنين قمح + زيت لوز حلو + زيت جوزهند نقلبه كويس ونرجعه العلبه وكل يوم قبل النوم دهان هتنبهري من النتيجه
غمقان المؤخره والحبوب
- هنعملها ماسك حنا بيضا مع الجسم
- حمام مغربي مع الجسم
- اندرات تكون قطن
- دهان زيت لوز بعد كل شاور ونسيبه
- سكرب بتاع الجسم مع الجسم
- ليفه مغربيه وخل فكل شاور ندعك المنطقه كويس
- استخدام التواليت برا البيت يكون ب اكياس للتواليت من الصيدليه نجيبها
- الخلطه دي هندهنها كل يوم قبل النوم
- فازلين + جلسرين سايل + زيت جوزهند+ زيت لوز + فيتامين ه + زيت ورد نقط + عصير نصف ليمونه
المناطق الحساسه
سكرب ليمون + عسل + لبن بودره + زيت لوز
مرتين فالاسبوع خلال الشاور وبعدها الترطيب بزيت لوز او جنين قمح
السكرب العادي اساسي معانا وقت متفضي اعمليه
سكر + عسل + زيت زيتون
اسكينول مع نقط زيت ورد وبقطنت ننضف المنطقه كل يوم
ترمس مطحون + زبادي هااااايل للمنطقه
ونبتدي نستخدم غسول للمنطقه طبي كل يوم ويوم
الجسم
- حمام مغربي مرتين فالشهر
- ماسك الحنا البيضا مرتين فالاسبوع
- سكرب الجسم كل يومين وانا كتبتلكو انواع كتير اختارو منها الي يناسبكو
- اللوشن دا مرطب ومعالج اعملوه فالبيت ويدهن بعد كل شاور
- جلسرين سايل + لوشن جونسون اطفال+ زيت جونسون اطفال + زيت لوز حلو + كبسولات فيتامين ه + زيت جوزهند
- احلي وصفه معالجه للجسم هايله ّ
الايدين
- سكرب كل يوم ويوم عصير ليمون + سكر + فازلين + جلسريت سايل
- دهان الايد زيت لوز كل يوم فنص اليوم
- قبل النوم كل يوم دهان فازلين طبي
- لوشن الجسم الي عملناه دهان بعد كل شاور
الرجلين
ضوافر الايد
طبق فيه عصير ليمون وزيت زيتون نحط فيه ايدنا كل يوم ويوم او بالكتير 3 مرات فالاسبوع
نضافة الاسنان ورائحة الفم
مهم جدا تعملي زيارة لدكتور الاسنان تشوفي مشاكل اسنانك لان دا كله بيأثر علي رائحة الفم الي اكيد تزعج كل البنات وقت فرحها
هنبتدي نستخدم معجون اسنان طبي زي دي جي كير هايل وبالوقت مش بيخلي اي ريحه للفم
ليسترين غسول للفم منتهي الجمال فتنضيف الاسنان وبردو بالوقت بيمنع ظهور اي رائحه للفم كريهه
فى ختام مقاليتنا مجلة عالم حواء تتمنى لكل عروسة السعاده الغامرة وشكرا
شكرا لك .. الى اللقاء
*
*
لاتنسى الاعجاب بصفحتنا عبر الفيس بوك لمتابعتة كل جديد وايضا من اجل التواصل معنا بشكل مباشر ومستمر.
تابعيمكنك الان متابعتنا عبر جوجل بلاس وارسال مقترحاتك وايضا حتى يصلك جميع الموضوعات الحصرية فور نشرها.
تابعتواصل دائما مع اصدقاء يشاركونك نفس الاهتمامات وذلك من خلال متابعة صفحتنا الرسمية عبر تويتر.
تابع
تابع